Psalm 4 Hebrew in Tamil
- לַמְנַצֵּ֥חַ בִּנְגִינ֗וֹת מִזְמ֥וֹר לְדָוִֽד׃
- בְּקָרְאִ֡י עֲנֵ֤נִי׀ אֱלֹ֘הֵ֤י צִדְקִ֗י בַּ֭צָּר הִרְחַ֣בְתָּ לִּ֑י חָ֝נֵּ֗נִי וּשְׁמַ֥ע תְּפִלָּתִֽי׃
- בְּנֵ֥י אִ֡ישׁ עַד מֶ֬ה כְבוֹדִ֣י לִ֭כְלִמָּה תֶּאֱהָב֣וּן רִ֑יק תְּבַקְשׁ֖וּ כָזָ֣ב סֶֽלָה׃
- וּדְע֗וּ כִּֽי הִפְלָ֣ה יְ֭הוָה חָסִ֣יד ל֑וֹ יְהוָ֥ה יִ֝שְׁמַ֗ע בְּקָרְאִ֥י אֵלָֽיו׃
- רִגְז֗וּ וְֽאַל תֶּ֫חֱטָ֥אוּ אִמְר֣וּ בִ֭לְבַבְכֶם עַֽל מִשְׁכַּבְכֶ֗ם וְדֹ֣מּוּ סֶֽלָה׃
- זִבְח֥וּ זִבְחֵי צֶ֑דֶק וּ֝בִטְח֗וּ אֶל יְהוָֽה׃
- רַבִּ֥ים אֹמְרִים֮ מִֽי יַרְאֵ֪נ֫וּ ט֥וֹב נְֽסָה עָ֭לֵינוּ א֨וֹר פָּנֶ֬יךָ יְהוָֽה׃
- נָתַ֣תָּה שִׂמְחָ֣ה בְלִבִּ֑י מֵעֵ֬ת דְּגָנָ֖ם וְתִֽירוֹשָׁ֣ם רָֽבּוּ׃
- בְּשָׁל֣וֹם יַחְדָּו֮ אֶשְׁכְּבָ֪ה וְאִ֫ישָׁ֥ן כִּֽי אַתָּ֣ה יְהוָ֣ה לְבָדָ֑ד לָ֝בֶ֗טַח תּוֹשִׁיבֵֽנִי׃